តុលាការ ឃុំខ្លួនមេភូមិ និងប្រពន្ធ នៅ ត្រពាំងប្រាសាទ ពាក់ព័ន្ធថ្នាំញៀន
14-March-2016 | ដោយ មែន កំសត់
ឧត្តរមានជ័យ៖ លោកមេភូមិ សែនសុខ ឃុំទំនប់ដាច់ ស្រុកត្រពាំងប្រាសាទ និងប្រពន្ធគាត់ ត្រូវសាលាដំបូងខេត្តឧត្តរមានជ័យសម្រេចឃុំខ្លួន បន្ទាប់ពីសមត្ថកិច្ចចោទប្រកាន់ពីបទ«ជួញដូរដោយខុសច្បាប់នូវ សារធាតុញៀន» ប្រភេទយ៉ាម៉ាចំនួន៧០ គ្រាប់ កាលពីសប្តាហ៍មុន។
លោក គយ កាន់យ៉ា ព្រះរាជអាជ្ញាអមសាលាដំបូងខេត្តឧត្តរមានជ័យបានប្រាប់ឲ្យដឹង ថា៖ តុលាការខេត្តបានចោទប្រកាន់ប្រធានភូមិម្នាក់ឈ្មោះ សេង រ៉ា អាយុ៦០ឆ្នាំ និងប្រពន្ធឈ្មោះ ភោគ មឿន អាយុ៥៧ឆ្នាំ បន្ទាប់ពីកងរាជអាវុធហត្ថ ស្រុក ត្រពាំងប្រាសាទ ចុះបង្ក្រាបនិង ឆែករកឃើញវត្ថុតាងថ្នាំញៀនប្រភេទយ៉ាម៉ាចំនួន ៧០ គ្រាប់ និង ឧបករណ៍ពាក់ព័ន្ធមួយចំនួន រួចបានឃាត់ពួកគេបញ្ជូនមកតុលាការចាត់ការតាមផ្លូវច្បាប់។
លោកបន្តថា ជនជាប់ចោទត្រូវបានតុលាការចោទប្រកាន់ពីបទ«ជួញដូរខុសច្បាប់ នូវសារធាតុញៀន» យោងតាមមាត្រាទី៤០ នៃច្បាប់ស្តីពីការត្រួតពិនិត្យគ្រឿងញៀនឆ្នាំ២០១២។ លោកបញ្ជាក់ថា៖«តុលាការបានសម្រេចឃុំខ្លួនជនជាប់ចោទទាំងពីរនាក់ ជាបណ្តោះអាសន្ន នៅពន្ធនាគារខេត្ត តែយើងមិនដឹងថា នឹងជំនុំជម្រះនៅពេលណាទេ»។
តាមការសួរចម្លើយអ្នកទាំង ២ សេង រ៉ា ជាប្តីបដិសេធថា ខ្លួនមិនពាក់ព័ន្ធនឹងករណីលក់ថ្នាំញៀននេះទេ ប៉ុន្តែមានជនម្នាក់ទៀតបានផ្ញើថ្នាំញៀនទាំងនេះទុកនៅក្នុង ផ្ទះគាត់។ ប៉ុន្តែផ្ទុយទៅវិញ ភោគ មឿន ជាប្រពន្ធបានប្រាប់ថា គាត់ទើបតែចាប់លក់ថ្នាំញៀនលើកទី១ នៅក្នុងមូលដ្ឋាន។
លោក វរសេនីយ៍ត្រី លី ដារិទ្ធ មេបញ្ជាការកងរាជអាវុធហត្ថ ស្រុក ត្រពាំងប្រាសាទ បានប្រាប់ឲ្យដឹងថា៖ « ជនជាប់ចោទ គឺជាមុខសញ្ញាចាស់របស់សមត្ថកិច្ច ដែលយើងបានឃ្លាំមើល១សប្តាហ៍ហើយ ទើបសហការជាមួយនឹងអាជ្ញាធរស្រុកនិងសុំដីកាពីព្រះរាជអាជ្ញារ ចុះឆែកឆេរនិងធ្វើការឃាត់ខ្លួន»។
តាមរបាយការណ៍ផែនការ៥ ឆ្នាំរបស់អាជ្ញាធរជាតិប្រយុទ្ធប្រឆាំងគ្រឿងញៀន ឆ្នាំ២០១១-២០១៥ បានឲ្យដឹងថា ការប្រើប្រាស់គ្រឿងញៀនភាគច្រើនស្ថិតនៅក្នុងអាយុពី១៨-២៥ ឆ្នាំ មាន៦០,៣៥ភាគរយ អាយុពី២៦-៤៥ឆ្នាំ មាន៣០,៩៧ភាគរយ និងអាយុពី៤៦ឆ្នាំឡើងមាន ២,៣៩ភាគរយ។
មេតំហ្វេតាមីនគ្រាប់ ដែលគេហៅថា យ៉ាម៉ា ជាប្រភេទគ្រាប់គឺជាគ្រឿងញៀនដែលមានការនិយមជាងគេ ប៉ុន្តែ ការប្រើប្រាស់មេតំហ្វេតាមីនម្ស៉ៅ(Ice) ក៏កំពុងកើនឡើងក្នុងចំណោមយុវជននៅរាជធានី។ ជាមួយគ្នានេះអត្រានៃការប្រើប្រាស់ថ្នាំញៀនច្រើនជាងគេមាននៅ ខេត្តប៉ៃលិន ស្ទឹងត្រែង ព្រះសីហនុ និងកោះកុង (មានអត្រាច្រើនជាង០,១១ភាគរយនៃប្រជាជន) ភ្នំពេញ ខេត្តរតនគិរី ខេត្តបន្ទាយមានជ័យ និងខេត្តបាត់ដំបង (អត្រាចន្លោះពី០,១១ទៅ០,០៥)៕
ចំនួនអ្នកទស្សនា
- ថ្ងៃនេះ1241
- ម្សិលមិញ12561
- សប្តាហ៍នេះ29191
- ខែនេះ51071
- ឆ្នាំនេះ51071
- សរុប20493527